Diy - سوي أغراض المدرسة بنفسك ^^

للبنات اللي يحبون لمستهم او بصمتهم على أشيائهم الخاصة

هذا الموضوع اهو المناسب لكم لأنه انتي اللي تصممين أشيائك المدرسية الخاصة

وراح تكونين مميزة لأنه انتي اللي سويتيه مو أحد ثاني

وخصوصا انه ممتع اذا كان عندك وقت فراغ 

يلا نبدأ !!!

اول diy  راح يكون هالأقلام الجميلة ميزتها بسيطة وشكلها مرتب 

راح نحتاج: أقلام رصاص و لزقة ملونة او عليها شكل مثل هالصورة

سهلة وسريعة مجرد انك تلفين اللزقة على قلم الرصاص حقك وبكذا انتهينا

ثاني واحد راح نسوية هو منظم للكتب او الملفات ينفع لبنات الثانوي والجامعه اللي عندهم لوكرات يرتب لك كتبك وأغراضك وحتى بالبيت تقدرين تستخدمينه عملي وجميل بدال ماتخسرين فلوسك وتشترين واحد مافيه شكل انتي جربي تسوين شي يعجبك وتضيفين عليه لمستك ^^

راح نحتاج:تغليفتك المفضله وعلبة كورن فليكس فاضية ومشرط بس!!

نجيب علبة الكورن فليكس ونقصه بشكل مايل مثل الصورة حاولوا تخلونه مرتب قدر الامكان وبعدين نغلفه بالتتغليفة الجميلة ...جميل ولطيف ومره سهل

آخر واح راح نسويه هو بورد للغرفة.. مره يسهل عليك حياتك وتحسين نفسك منظمة لما تستخدمينه ..هذا الشي الله يسلمكم لوحة تعلقينها في غرفتك وتعلقين عليها الملاحظات المهمة اللي عليك زي مثلا عندك اختبار مهم ولا واجبات ولا مشروع لازم تسوينه بس كتبي وعلقي عالبورد ...في اكثر من شكل وطريقة عشان تسوينه 

ومره سهل ولايحتاج تعب

راح نحتاج:فلينه او كرتونه مربعه ,تغليفتك المفضلة,الدبابيس تقدرين تستغنين عنها لأن مراح نسويه نفس الصورة بس تقدرين تستخدمينها عشان تعلقين الملاحظات اوكي

راح نغلف الفلينه بالتغليفة عدل بعدين جيبي قلم سبورة وكتبي من فوق كلام تحبينه او مثلا بورد الدراسة,ملاحظاتي,هديل المتميزة>>اسمي ^_^

طيب بعدين علقية على اي بقعة مناسبة في غرفتك وممكن ماتعلقينه عادي حطيه على تسريحتك اهم شي مكان تشوفينه وبس ..بعض الصور اللي ممكن تفيدكم

 

أتمنى استفدتوا وحبيتوا هذي الأشياء الجميلة وان شاء الله اسوي موضوع ثاني عنها اهم شي انكم تسونها وتستمتعون فيها .. اذا في اي شي عجبكم وتبون اكثر بس قولوا لي اوكي ..

اجمل الاقتباسات

احب الاقتباسات واقراها من وقت لوقت تعطيني

ايجابية وتفاؤل وعاطفة وطموح جديد 

لأن اللي قالوها اشخاص مثلنا وحققوا اشياء كبيرة في حياتهم

فليه مانصير مثلهم واحسن منهم بعد !!

وعاد جمعت لكم بعض من اقتباسات حكماء,علماء,مفكرين,محبين,ممثلين:

” ان كنت تعتقد انك صغير جدا لإحداث تأثير فيمن حولك , فجرب النوم وفي حجرتك بعوضة واحدة “انيتا روديك , مؤسسة سلسلة محلات (ذي بودي شوب )

” لا تجلس وتنتظر من الاخرين تحقيق حلمك الذهبي لك , بل انهض وحققه بنفسك “ديانا روس , ممثلة ومغنية امريكية

"عليك أن تكون أنت التغيير الذي تريده للعالم".المهاتما غاندي

"ما اجمل أن تكون شخصاً كلما يذكرك ألاخرون يبتسمون". مارك توين

"ثمة أمر مريح في الموت. إن فكرة أنك قد تموت غداً تحرّرك كي تقدّر حياتك الآن".انجلينا جولي

"الحب ليس رواية شرقية بختامها يتزوج الأبطال".نزار قباني

“وقالوا لو تشاء سلوت عنها . . فقلتُ لهمْ فانِّي لا أشَاءُ”قيس ابن الملوح

ونختم هذه الاقوال بقول احب خلق الله لنا 

عَنْ أَنَسٍ بن مالك رضي الله عنه، قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: " لَا يَتَمَنَّيَنَّ أَحَدُكُمُ الْمَوْتَ لِضُرٍّ نَزَلَ بِهِ، فَإِنْ كَانَ لَا بُدَّ مُتَمَنِّيًا فَلْيَقُلْ: اللهُمَّ أَحْيِنِي مَا كَانَتِ الْحَيَاةُ خَيْرًا لِي، وَتَوَفَّنِي إِذَا كَانَتِ الْوَفَاةُ خَيْرًا لِي " (صحيح مسلم)

اتمنى تعجبكم هذي الاقتباسات وتكتشفون معانيها بأنفسكم .. كيف نقدر نحقق احلامنا
بس بمجهود بسيط هالأشخاص زينا زيهم وشوفوا
كيف قدروا ينجحون في حياتهم فلاتستسلمون وحققوا احلامكم واهدافكم ^^
دمتم بود وايه صح قولولي ايش اكثر اقتباس حبيتوه

Diy drinks- سوي عصيرك بنفسك

diy drinks

سمعتوا عن diy من قبل احين كل الناس هابين فيها معناها سويها بنفسك اشياء سهلة وبسيطة مثل
ديكور او اكل او علبة او عصير كذا جميل ينعشكم في هالصيف الحار.. هالمشروبات صج شي
شي احب اسويه اول شي تستمتعين وانتي تسوينه وبعد تستمتعين بالمذاق
 لما تخلصينه مره شي جميل وراح يعجبكم
اوكي نبدأ!!!

**************

  Pineapple and Mint water 

اول شراب راح نسويه باينابل مينت مره سهل وسريع ولاياخذ دقايق

راح نحتاج :
اناناس مقطع
شوية نعناع
ثلج
ماء أو مشروب غازي مثل السفن اب
ومحلي حسب الرغبة

ملاحظه: نقدر نستغني عن الخلاط*

"اول حاجة راح نعملها نحط الاناناس والنعناع في الكاس اللي راح نشرب فيه ونجيب الخلاط اليدوي ونخلط
لما تنخلط النكهات نضيف الثلج والماي أو السفن اب  مع المحلي" 

عن نفسي انا احب اسويه دايما لما احس بحر وعطش واحب أبدل الماي بالسفن اب واغير الأناناس بالليمون ..طبعا انتوا تقدرون تبدلونه باي فاكهة تحبونها ..مراات اسوي بالبرتقال ومرات احط خيارمع النعناع مره مره منعش وحلو وفوايده كثيره 

**********

*****

 starbucks drink

واحد من اشهر مشروبات ستار بكس اللي هو كوتون كاندي فرابتشينو بدال ماتروحين ستار بكس وتخسرين فلوسك سويه في البيت واستمتعي بالطعم

الـطريقة موجودة بالصورة بس بكتبها بالعربي راح نحتاج:

ثلثين كوب ثلج

ثلثين كوب حليب

ملعقتين صغار من سيرب التوت(موجود بالسوبر ماركت)

ملعقتين صغار من سييرب الفانيلا (من السوبر ماركت)

مغرفتين ايس كريم فانيلا

"اخلطي جميع المقادير مع بعض في الخلاط وصبيها في كوب التقديم وزينيه بالدريم ويب واي شي انتي تحبينه"

***********

*****

diy green tea lime drink

هذا المشروب بعد من ستار بكس مشروب الشاي الاخضر بالليمون  مره سهل ومنعش ورايق

راح نحتاج :

- شاي اخضر نقعيه بماي حار لمدة دقيقتين وبعدين خليه يبرد

-مشروب غازي وأنا استخدمت السفن اب 

- عصير نصف ليمونه
- سكر سيرب او شيرة بس تكون بيضاء أو ممكن عسل
- ثلج 
- شرائح نعناع

*تقدرين تسوين سيرب السكر في البيت طريقته: ثلاث ارباع كوب سكر مع ثلاث ارباع كوب ماي وحطيهم عالنار لما يسخن وانتي تحركين طفي النار وخليه يبرد شوي بتشوفينه صار متماسك زي الشيرة حطيه بغرشة و صار جاهز حق اي مشروب تسوينه بالمستقبل 

" اول شي نصب شوي سيرب سكر على عصير الليمون ونخلطهم الكمية حسب الكوب اللي راح تستعملينه نصب عليهم الشاي الاخضر مع السفن اب و نضيف الثلج .. قطعي شرحيتين ليمون مع شرايح النعناع و أضيفيها على شرابك "

***********

******

اتمنى تسوون هالمشروبات وتقولون لي ايش عجبكم اكثر شي لأني دايما اسويها تغيرين روتين عن المشروبات العادية
تراها مره حلوة ومنعشة للصيف واتمنى تعجبكم

ايش هي مدونة gir ^^

!!!!!hi every body
اهلا جميعا بمدونتي gir
طبعا اسم المدونة جا بالغلط وانا اسويها وما عرفت اغيره ^^
اعرف بنفسي اول اسمي هديل وادرس بجامعة الدمام دخلت هندسة وراح احول علمي لان الهندسة ماعجبتني ابدا
وارحب بأي اسئلة عن المجالين للي بيدخل الجامعه ^^
احب الرياضة على اني مب ضعيفة بس امارسها من فترة لفترة واعشق الكتب والروايات
عشان كذا سويت مدونة^^ اسجل فيها الاشياء اللي احب اسويها والاشياء اللي فادتني بحياتي عشان تستفيدون منها
يمكن ماتكون مدونتي مختلفة عن باقي المدونات بس يلا تغيير روتين وعشان
اونس نفسي قبل ماتخلص الاجازة^^
وبس اللي يبيني اسوي اشياء اهو حابها يقولي وودي تشاركوني بأي شي في الحياة