طرق مذاكرة اللإختبارات للجامعيات

الإختبارات!! 

هي كلمة وقعها كبير على قلب وعقل كل شخص عايش في هذا العالم خصوصا للي يدرسون بالجامعه..مستحيل تلقى ناس ماعانوا من التعب والخوف والتوتر وقت المذاكرة وأثناء حلّ الإمتحان..لذلك اليوم موضوعنا اليوم هو طرق مذاكرة للإختبارات 

راح أعطيكم عدة طرق للمذاكرة على حسب الإختبار + نصائح بسيطه من واقع تجربتي وهي اللي فعلا استخدمها بحياتي

حابة أضيف أن هالشي مايُعتمد دائما..لأن قدرة الإستيعاب تختلف من شخص لآخر وكل واحد يعرف نفسه وطريقة تفكيره.. علشان كذا مو شرط تنفعك هاذي النصائح لكن لابد من التجربة لأن ممكن اذا جربتها تحس انها فعلا مفيده وهالشي لاحظته مع نفسي وأكثر من شخص حولي

هالمرة بخلي الطرق من حقوقي فهي مني شخصياً هديل وليد الفرحان..لا أحلل أي شخص يآخذها ويتاجر فيها أو يكتبها بإسمه!

الطريقة رقم(1)

وهاذي تستخدم للكويزات والاختبارات القصيره في الجامعه
بالبدايه أبغى أقولكم عن جمله قالتها لنا دكتورة الانجليزي بالجامعه ورسخ بمخي وللحين أطبقه
قالت أن لاتحطون كل طاقتكم في الاختبارات القصيره أبدا..فقط أقرأي قراءة مركزه واختصري الأشياء الطويله..أما الإختبارات الشهريه أو الميدات حطي نصف طاقتك فيها لكن لاتهملين نومك وأكلك علشانها..و أخيرا الإختبارات النهائية الفاينل هذا الي تحطين كل جهدك وطاقتك فيه لأنه عليه الدرجات الي تنجحك و هو آخر شي لك بالماده

^ طبعا ماكان هذا كلامها بالحرف لكن أنا كتبته لكم بمفهومي وهذاالكلام اللي فوق هو طريقتي بالمذاكره بالجامعه ومره مرتاحه عليها وأجيب فيها درجات كويسه الحمدلله



طيب نرجع لمذاكرة الكويزات..أنا شخصيا أفكر فيها ببساطه حتى تجيني أوقات ما أذاكر عدل لأنه مجرد اختبار قصير مو شرط أهتم له كثير وأحط كل حيلي فيه

 فقط أعتمد على الملاحظات اللي كتبتها مع الدكتورة و أخطط نفس المحاضرة

يعني اذا في تعريفات أأشر عليها واذا في جمل حسيتها مهمة أشرت عليها وحفظتها  و المهم المهم اذا كانت الماده فيها مسائل هي اللي تركزين عليها و تذاكرينها كتابة بيدك

خذيها قاعده: أي شي فيه قوانين..مسائل..أرقام..هذا يتذاكر كتابة!!

يعني بس قعدي عالمسألة وخلي يدك هي الي تذاكر وعقلك يحفظ القانون بس وكل مازادت المسائل صعوبه كلما تعيدين نفس المثال وانتي تكتبينه بيدك..ممكن تغيرين الأرقام علشان تستوعبين الأمثله أكثر

أخيرا قبل الإختبار بنفس يومه تفتحين على نفس لمحاضره وترجعين تقرأينها قرءة عاديه

 لاتتعبين نفسك كثير بالكويزات الا اذا كنتي انتي نفسك تبغين درجات من البداية وكنتي طموحه بكل صراحه أقولك هاذي الطريقة ماتناسبك

طريقتي أنا للبنات اللي يبغون ينجحون بالمواد بدون ماتتعب كثير بالدراسه بس اذا انتي نفسك تبغين تكونين دايما بالقمه لا لازم تتعبين وتتعبين وتتعبين .. لأن هذا طموحك وصدقي  أنك بتكونين الأفضل





طريقة (2)

هاذي الطريقة للإختبارات الشهرية أو الميدات وتختلف حسب صعوبة المادة 

اذا كانت المادة صعبة جدا بالجامعه ممكن تقسمينها على يومين قبل الإختبار..أولا لازم تكونين مخططه المحاضرات من قبل يعني تجيبين قلم فسفوري يفقع العيون وتأشرين على كل الجمل المهمة وتترجمين الكلام الانجليزي لعربي



ليه هالحركه مهمة وايش فايدة القلم الفسفوري ؟ طبعا مو كشخه وزينه لا أثبتت دراسات سابقه بأن الألوان الساطعه تخلي عقلك يتفتح والجمله اللي أنتي مأشرتها بلون قوي راح يحسس عقلك أنها مهمه وترسخ أكثر 

التخطيط يوم لحاله وممكن تسوينه بأيام الكويزات القصيرة علشان قبل الميدات تكونين مخططه محاضراتك من قبل وتفتكين من هالموضوع

قبل الإختبار بيوم تآخذين محاضراتك وتروحين المكان اللي تحبين تذاكرين فيه..غرفتك..ممكن المطبخ ..المجلس.. السطح ,.أي مكان يحسسك بالهدوء والراحه 

طبعا قلمك جاهز ..مافي جوال ولا لاب توب أبدا ممنوع!

أبدأي بمحاضرة طويله صعبة وبعدها محضره قصيره أوطويله بس تكون سهله عليك وكرري هالشي..يعني صعب سهل صعب سهل كذا تمام 

طيب اذا كانت أغلب المحاضرات صعبه حاولي تبدين بالأصعب والأطول..وأيضا بعد محاضرتين أو ثلاث خذي راحه ربع ساعه عالجوال مع قهوة أو شاي وككاو..هالحركه مهمه جدا جدا 

ليه؟؟

لأن عقلك راح يثبت المعلومات السابقه ويحتاج يرتاح شوي علشان يقدر يتقبل المعلمومات الباقية الجديده..اوك !

تقريبا حسب تجربتي المواد الصعبة اذا ذاكرتيها بيوم واحد قبل الإختبار تحتاج سبع ساعات وعلى حسب سرعة الشخص 
أما المواد السهله من 3 الى 4 ساعات أو حتى أقل

طبعا نفس الكويزات لابد من المراجعه قبل الاختبار بساعه 





طريقة (3)

وصلنا للإختبارات النهائية الفاينلز !!

هذا الوقت اللي تحطين فيه كل طاقتك و أنا أقولها حرفيا كل كل طاقتك لأنها الفرصه الأخيره للحصول عى درجات مثاليه 

طبعا عندك الأسبوع الفاضي قبل الاختبارات علشان تخططينه وترتبين المواد عليه 

أنا بداية الأسبوع أذاكر المواد الأخيره واللي تكون بعيده علي ونهاية الأسبوع نفسه أذاكر المواد اللي علي في أسبوع الإختبارات الأول

المواد الصعبه أخلي لها ثلاث أيام لها لحالها أو أذاكر معاها ماده سهله 

طريقتي في الأسبوع الفاضي لكل ماده هي :
أشتري دفتر كبير كبير من أيام الإختبارات الشهريه ويكون معاي 
 بعدما أخطط المحاضرت أكتب فيه الأسئة اللي محتمل تجي بالإختبار لكل ماده وأرتب فيه المسائل اذا كانت الماده كلها قوانين..لازم تكتبين كل شيء بيدك !



اذا كان في رسوم أرسمها..اذا في أسئلة رسلوها بنات القروب انها مهمة أكتبها..الزبدة انه يكون دفتر الأسئله ومن أيام الميدات لازم يكون موجود بس نسيت أذكر هالنقطة فوق

الآن في النهائي تفتحين المحاضرات مع دفتر الأسئلة وتذاكرين منهم على نظام ساعتين ساعتين !

ايش نظام ساعتين ساعتين ؟
 هذا نظام أنا مخترعته بنفسي بمعنى ساعتين مذاكره وربع أو نص ساعه بريك بعدها ترجعين ساعتين مذاكره و بعدها بريك وهكذا 

طبعا هالنظام حبيته جدا نفعني يخليني أخلص الماده بوقت مناسب و أحيانا يبقى وقت للمراجعه!

طبعا أيام النهائي .ممنوع اللاب منعا نهائيا..محاضراتك تطبعينها وتكتبين عليها وتشوفينها قدامك أنا كذا نظامي مستحيل أذاكر من اللاب جربتها أول سنه ولا نفعتني وتعورك عيونك لأنك تذاكرين من اللاب لا وسهرانه بعد يا سلام

علشان كذا تطبعين أفضل..وطبعي كل أربع شرايح بصفحه لاتغلطين وتسوين كل شريحه بصفحه كذ بتحسين المنهج طويل ولا يخلص حتى لو تبين الخط كبير سوي شريحتين بس أنا أشوف الأفضل أربع 

وبس والله..في نصائح عندي لكن ماعرف كيف أشرحها كتابة هنا .. أتمنى أنكم  تستفيدون فعلا واذاطبقتوا أي خطوة من خطواتي وعجبتكم وفادتكم أدعو لي 
ان شاء الله تنجحون وتتوفقون يارب..فكروا دائما أنها مو نهاية الحياة اذا أخذتوا درجات سيئه أو رسبتوا بماده لا تبكون أبدا فكروا انها خيره وان ربي بيعوضكم خير

الحياه أكبر من شهاده ودرجات.. الله يوفق الجميع يارب وإلى لقاء آخر