الرسائل الجميله

.
تدوينه جديده بعنوان "الرسائل الجميله" 

.

ستكون ان شاء الله كلمات جميله في الحياه..ترسلها لمن تحب..لمن تكره..لمن تملك عداوه معه..و لمن تملك له المعزة في قلبك 

بمعنى انك راح تكون متصالح مع نفسك أولا ثم مع العالم و أخيرا مع الناس ^^

.

أتمنى يكون وصل لكم المعنى و راح تفهمون علي اذا قرأتم المكتوب 

كلها كلام بسيط في كل فتره راح أنزله وكل المطلوب منكمانكم تتعمقون فيه حتى يدخل قلوبكم قبل عقولكم 

.

أول رساله بعنوان "هل تريد مراهنة حياتك بأخرى؟"

.

أحيانا لما أقعد من النوم الصباح و أكون الى الآن منسدحه على السرير أقعد أتفكر بحياتي و أشوف كل سلبياتها لما تجيني ضيقه كبيره بقلبي وأقول لو كنت غنيه مثلا او اني خلصت دراسه وافتكيت وتخرجت او أنا ما حب نفسي و أكرهها وأتمنى لو ما كنت انا نفس الانسان اللي عايش هالحياه ...

.

طبعا تتكاثر هالأفكار البايخه والسخيفه و بعدها فعلا أكره حياتي وأحس اني أصغر انسانه على وجه الأرض..بس فجأه يتغير مسار أفكاري لشي ثاني أو بالأحرى لشخص ثاني 

.

أقعد أفكر لو كنت فاقده حاسه من حواسي الخمس لا سمح الله..

مثلا اذا اعتميت فجأه وصرت ماشوف اي شي غير اللون الأسود..كيف راح تكون حياتي؟! كيف راح أعيش نفس روتيني اليومي..كيف اسوي احتياجاتي ..كيف راح ادرس للجامعه واطلع مع اهلي واروح واجي على كيفي؟ كيف بعيش؟؟

اسبح بتخيلاتي واعيش هذا الدور..اغمض عيوني واشوف الظلمه واتخيل حياتي كلها ظلام..فعلا كيف بعيش؟

.

افتح عيوني بسرعه واحمد ربي بكل جوارحي واشكره على النعم اللي احس فيها واللي ما احس فيها وكوني انولدت كامله والكمال لوجهه سبحانه 

.

ينتقل تفكيري بنفس اللحظه لحياة شخص آخر..شخص مريض بمرض خطير الله يشفي جميع مرضى المسلمين ويقومهم سالمين يارب

.

لو كانت حياتي مثل حياة انسان مريض بالسرطان مثلا لا سمح الله..بتكون ثلاث ارباع يومي بالمستشفى والربع الباقي الوحيد اللي بيكون لي علشان اعيشه ..اقوم من سريري واشوف نفسي بالمرايه و اتخيل شعري اللي راح يطيح مع الأيام من العلاج..أتخيل وجهي اللي راح يذبل من التعب والضعف والموت 

.

ابلع ريقي واتنهد بقوة ((الحمدلله)) 

.

الحمدلله على حياتي اللي يتمناها الف واحد ووحده..الحمدلله على نفسي على شكلي على كل شي بحياتي ربي رزقني وقدرني اياه الحمدلله

.

تشوفين حياتك ناقصه احيانا..تشوفينها اقل من معظم الناس..تكرهين حياتك ونفسك لأسباب تافهة مالها معنى وغيرك يتمنى حياتك ويحتاجها ويقول ياليتني مكانك!

.

عيش يومك بسعاده..بحب..بتفاؤل..وخل عنك الأفكار السلبيه والهموم والكره..عيش كأنك راح تموت بكرا 

.

تخيل انك بتموت بكرا ايش راح تسوي بهاليوم اللي عندك؟ بتقعد تلوم نفسك وتغرقها حزن وهم ؟ لأ راح تعيش وبتسوي كل شي تحبه بحياتك..وهذا المعنى من كل الكلام وهاذي الرساله اللي أكيد كل من يقرأها بيجاوب بمستحيل

.

*مستحيل أراهن حياتي مع حياة انسان ثاني حتى لو كانت حياته أجمل بمليون مره من حياتي اللي أعيشها*

.

دمتم بود ألقاكم برساله جميله أخرى ان شاء الله ^^

قلم / هديل وليد الفرحان

"أشياء جديده راح أسويها سنة 2017 ^^

أشياء جديده راح أسويها سنة 2017 ^^

~*~*~*~*~*~*~*~*~*~
بإذن الله راح نبدي سنه جديده بعد شهر تقريبا وعلشان كذا حبيت أرتب الأشياء اللي كنت أتمنى أسويها السنه اللي فاتت ولا مداني الوقت اني افكر فيها

من ناحية العناية بالنفس اللي دايما أهملها لما تجي الدراسه لأن مايكون عندي وقت بس ان شاء الله هالمره غيرراح أسوي عناية بسيطه يوميه + يومين للخلطات والماسكات

.

*راح أكتب جدولي هنا للي عندها اهتمام انها تبدأ مثلي بهالشي..خصوصا يا بنات ان اهتمامك بنفسك جدا مهم لمستقبل بشرتك و جسمك وأحلى انك تتعودين عليه من الحين.طيب الجدول ان شاء الله راح يكون:.

-يوم الجمعه للجسم* حمام بماء الورد +تقشير بمقشر الملح+الترطيب بزيتك المفضل.

للوجه* ماسك الشوفان بالعسل والكركم.

-يوم الاثنين.يكرر نظام يوم االجمعه كامل.

-كل يوم

*في الصباح قبل الدوام وبالليل قبل النوم.. اغسل وجهي بصابونه مناسبة لبشرتي (أنا استخدم صابونة الكركم مناسبه مره للي بشرتها دهنيه..تصفي الوجه وتفتحه وحتى تلاحظين ان الحبوب تختفي بسرعه اذا داومتي عليها..أنصح فيها للي متأزمين من حب الشباب).

*احط على وجهي تونر مناسب لبشرتي(ماء ورد أعبيه بمرش او تونر الخيار من الصيدليه)

*ترطيب الجسم يوميا بالصبح والليل

*ترطيب الشفايف يوميا ومافي أفضل من الفازلين للترطيب

****************

ماسك الوجه المعتمد عندي : ملعقة شاي أخضر مطحون + ملعقة بذر كتان مطحونة + ملعقة زبادي أو ملعقة ماء الورد

^تحطينه على بشره نظيفة لمدة عشرين دقيقه وتغسلينه بماي بارد^

.

المقشر المعتمد عندي: كميه ملح خشن او سكر + زيت زيتون (المقدار غير محدد اللي تحسينه مناسب لك حطيه) واحيانا اضيف بدال زيت الزيتون (زيت الجلسرين+شوي زيت اللوز الحلو)

^ اول شي علشان ينجح التقشيرلازم تتنقعين بماي دافي بالبانيو لمده تقريبا عشر دقايق لربع ساعه بعدين تبدين تقشرين جسمك كامل بالمقشر بطريقه دائريه ..تقعدين شوي بعدين تغسلين جسمك بماي بارد..

آخر خطوه وهي اهم خطوه ضروري ضروري ضروري ترطبين جسمك بعد التقشير واذا ماسويتي هالحركه بتصيرين كأنك ماقشرتي من الأساس رطبي جسمك بزيتك المفضل

 (زيت جونسون او زيت الزيتون او زيت الجلسرين او زيت جوز الهند اللي يعجبك)

*.

من الأشياء اللي أبي احققها بعد هو اني انهي تقريبا 20 كتاب او اكثر عالسنه الجايه ومتأكده اني اقدر احقق هالهدف بسبب حبي الشديد للقراءه

~*~*~*~*~*~*~*~*~*~

الكتب اللي ودي فيها صراحه ومن زمان أسمع عليها مدح : -الخيميائي-في كل قلب مقبره-قصة مدينتين-ثلاثية غرناطه-قواعد العشق الاربعون-لا تحزن-ذاكرة الجسد

*

انا اساسا مشروبي المفضل هو الماي فمستحيل اتخلى عنه بس بجرب السنه الجايه اني اخليه مشروبي الوحيد يعني ابعد عن المشروبات الغازيه والعصاير اللي كلها سكر وممكن اخذ لي واحد مره كل شهر بس راح اوعد نفسي اني اشرب 3 لتر ماي يوميا وبحرص اني اشرب من الديتوكس

.
*الديتوكس: ماء منكه بالفواكه او الخضار يطهر الجسم ويبعد السموم ومره مفيد للبطن
.
(اكثر ماء ديتوكس احبه هو اللي بالليمون والخيار والنعناع..هذا التوب عندي مره يجنن وفرش ومنعش وكل شي فيه حلو)
.
يتبع في جزء آخر بإذن الله
الى اللقاء*

ماذا أفعل عند الشعور بالملل؟؟

ايش أسوي لما أحس بالملل؟؟

الإجازه طويـــــــلة وقاعده تضيع منك وانتي بس قاعده على اللاب؟! تحسين بالطفش كل يوم ومو قادره تغيرين الروتين؟! 

راح نعرض فكرتين بسيطيتن راح تبعد عنك الملل خصوصا انها ممتعة ومفيدة بنفس الوقت..مو لازم تسوينها كل يوم..شوفي اللي تحسينها بتكون حلوة واعمليها على طول..لأن اذا حطيتي هدف قدامك أكيد بتحققينه 

#أول_فكره *

جرة الملل

bored jar

طبعا هو صندوق او جرة تحطين فيها كل الأشياء اللي تحبين تسوينها في البيت او المهمات اللي ما سويتيها من قبل..او الأشياء اللي من زمان ودك تسوينها بس دايما تتعذرين بالوقت ولا بالناس ولا بأي شيء

1/تجيبين أي صندوق او كرتون او اي شي نفس اللي بالصورة ينفع تستخدمينه

2/ اكتبي اي شي ودك تسوينه بأوراق صغيرة وراح أكتب بعض الأمثلة ولكم حرية الاختيار والكتابة^^

*اشوف فلم جديد

*أقرأ رواية الكل يمدحها

*اسوي حلا من الانستقرام

*انظف غرفتي واغير ديكورها

*العب مع اختي اي لعبة من النت

*اشتري شي كنت ابيه من زمان

*اسوي رياضة جديدة مثل الزومبا

*أسوي مدونة وأكتب عن حياتي

*أتعلم لغة جديدة

*اسوي مقشر ومرطب طبيعي 

*أجرب ميك اب جديد

*احفظ كم سورة من القرآن

*أساعد أمي اليوم كله

*وأي شي في الحياة كتبيه وحطيه داخل الصندوق تبعك 

3/أي يوم تحسين فيه بملل غير طبيعي..امسكي الصندوق..هزيه شوي..واختاري ورقة وحده..راح تتفاجئين من المكتوب لأنك نسيتي أساسا ايش كتبتي..ولازم تنفذين اللي كتبتيه بالحرف الواحد ..وبس هالفكرة مره عجبتني وسويت لي صندوق بنفسي..جميلة وسهلة وبسيطه^^

#الفكرة_الثانية *

(مشروع جديـــــــد!)

في هاللحظة فكري بحلمك اللي تبين تحققينه في الحياة..ايش المكان اللي ودك تكونين فيه..دكتوره.. رسامة.. مهندسة.. مبتكرة ألعاب.. مساعدة للأطفالفكري بعمق شديد واذا عرفتي هالحلم اسعي لتحقيقه..مهما كان مافي شي مستحيل واذا اجتهدتي كل شي بيكون معاك بإذن اللهمشروع جديد يعني اسوي شي له علاقة بطموحي..

*مثلا انا ابي اصير رسامة مشهورة  الكل يروح لمعارضها ويشتري لوحاتها..بما ان هذا حلمك نمي مهاراتك في هالموضوع..ارسمي وتعلمي وشوفي فيديوهات..ادمجي الألوان واشتري لوحة كبيرة وارسميها..علقي رسوماتك في كل مكان او احفظيها في كراسة كبيره عندك..وهذا هو الشي اللي اقصده

*مثال ثاني انا ابي اصير كاتبة مشهورة وتنطبع كتابتها والكل يقرأها..اقعد اكتب في اليوم اكثر من خاطرة او مقال..اعبر عن اي شي اشوفه بكلمات جميلة..اجرب اكتب رواية او قصة واشوف ردة فعل الناس وتشجيعهم لي

شوفي طموحك و خلي حلمك فوق في العالي لا تتركينه في رف ملئ بالغبار وتهملينه..ولأن الله معاك لا تفكرين بشي اسمه مستحيل..كلنا نقدر نسوي شي مهم في حياتنا بس ناقصنا الإرادة..قوّي عزيمتك وشوفي المستقبل بعين التفاؤل

فكرتين جميلتين* وتنفيذهم سهل جدا جدا جدا جدا جدا.. يبعدون الملل و يشغلون الفراغ بشي مفيد ممتع وجميل..سنعود بأفكار جديدة في المستقبل بإذن الله..الى الملتقى يا أصدقاء^^

خاطرة/لم أعد تلك الفتاة

خاطرة/ لم أعد تلك الفتاة!!

.

لم أعد تلك الفتاة التي تسيطر عليها مشاعرها وتذهب مع الريح ..

لم أعد تلك الفتاة التي يحركونها كيفما شاؤوا وكانها دمية بين ايديهم الكبيرة..

لا أملك الذكريات لقد محوتها تماما وكأنها لم تكن ..

وتلك الجروح لم تلتأم ولكني أبقيتها حتى تزيديني قوة في كل مرة أراها..

لم أعد ضعيفة مهزوزة و كانني غصن مكسور..تركته تلك الشجرة وكأنه لم يكن جزاء منها في يوم ما..

لقد تماسكت وألقيت أقنعة الغباء والابتسامة الساذجة التي لطالما أستعملتها..

اشعر كأنني استطيع العيش الآن..بحرية! كذلك الطير في السماء يحلق اينما يريد ولا يهتم بالآخرين

دعهم يتكلمون..دعهم يعلنون ويجاهرون بصوت عال..

لقد تغيرت! ولا يهمني بعد الآن من انت ومن انا ..ولماذا تعيش واعيش انا

شكرا لكم ولكل من قال بأني غريبة ..ضعيفة..معقدة..لا فائدة منها في هذه الحياة 

لقد جعلتموني أتغير وأفكر وأندم انني ضيعت جل وقتي في كلماتكم السخيفة عني وعن غيري 

انتظروني فإني قادمة..لقد تغيرت ولم اعد انا التي تعرفونها كلكم

سأريكم ما أستطيع فعله ومن هي تلك الفتاة عديمة الفائدة..

بقلمي / مجرد همس*

  

مدخل رواية فإذا وقفت أمام حسنك صامتا فالصمت في حرم الجمال جمال/بقلمي مجرد همس

مدخل للرواية

في أجواء باريس البارده كان واقف أمام مبنى راقي جدا في تصميمه وفي المنتصف لوحه موضوعه بشكل مميز مكتوب عليها بالفرنسي دار "dreem s" للأزياء ابتسم وهو يتأمل باقة الورد الأحمر الجوري اللي بيده "ياترى تغيرت حبيبتي ولا ظلت مثل ماتركتها ؟"دخل وهو يدفع الباب الزجاجي للأمام وتقدم بسرعه متوجه للمكتب اللي في نهاية المحل ..اول ماشافته السكرتيره وقفت بتوتر وكلمته بالانجليزي : مالذي تريده ياسيدي انت تعلم بأن الرئيسه لاتريد أن تراك لقد نسيتك تماما ولاترغب بالبدء معك من جديد
.......: أنسيتي بأنها ماتزال زوجتي ولادخل لأحد بذلك !!
السكرتيره بحده : ولكنها اكتفت منك الا تفهم ما....
قاطعها صوت المايكروفون الموصول بالمكتب : أدخليه يا رانيا
قربت رانيا بسرعه عند المايكروفون وضغطت على الزر : ولكن ياسيدتي انتي لاتريدين رؤيته !!
......: لا بأس انا استطيع التصرف معه دعيه يتفضل بالدخول
بعدت رانيا عن المسجل بعصبيه وراحت قدامه وهي تفتح باب المكتب قالت بنظرات كلها حقد : تفضل ياسيدي
ابتسم للحظه وتوجه لداخل المكتب وهو متوقع كيف راح تكون شخصيتها الجديده صار لها مدة طويلة مبتعده عنه برغبتها وهو ماحاول ابدا انه يرجعها لأنه يدري انه اذنب بحقها كثير بس ماقدر يصبر على فراقها اكثر خصوصا بعد ماصار يشوفها بكل مكان في الجرايد والتلفزيون وحتى بالشوراع جا الوقت اللي ياخذها برضاها ويستعيدها بحبه
مد لها الباقه وكله شوق لقربها : اقبليها ولاتتعبيني
ابتسمت على جنب ورفعت حاجب: حتى بعد هالفتره الطويله اللي ماشفتك فيها تجبرني على أي شي انت تبغاه يا زوجي العزيز
وقفت بكل ثقه ومشت قدامه بفستانها العنابي الطويل..من اول ماقامت وهو عيونه مانزلت عنها أخذت الباقه من يده ومشت لعند الزباله رمت الباقه بكل قوتها داخل الزباله
ولفت بعيونها عليه وابتسمت بانتصار قالت بسخرية وهدوء شديدين: الورد للجميلات فقط اما انتي فلا تستحقين حتى واحدة ..تتذكر كلامك ولا نسيته؟
انصدم باللي سوته بس مابين لها وقال بابتسامه : تغيــرتــي كثيــــــــر يا ســــــــــــــاره

روايتي عالانستقرام

@hadoolh1239 

هذا حساب روايتي عالانستقرام لقراءة أسهل و أسرع  أتمنى تضيففوني وتدعموني وتتفاعلون معاي لأن حلمي اللي ناوية أحققه بإذن الله اني أكون كاتبة مشهورة .. دمتم بود الكاتبة / مجرد همس*

روايتي الأولى بقلمي / مجرد همس

لكل من يقرأ في مدونتي .. أحب أقولكم  بأني  بديت أكتب روايتي الأولى بعنوان /  فإذا وقفت أمام حسنك صامتا

فالصمت في حرم الجمال جمال 

أتمنى من كل قلبي أنكم تروحون تقرونها في منتدى غرام قسم الروايات الطويلة ادعموني وتفاعلوا معاي .. وراح أنزل الرواية هنا بس مو الحين اذا فضيت ان شاء الله

هذا هو رابط الرواية للي حاب يقرأها ..تحياتي لكم 

http://forums.graaam.com/608062.html

أكلات آخر الليل **

لما نسهر في الليل دايما نحس الجوع نشتهي كل شي بس المشكله في الكسل نبي شي سريييع وماندري شنسوي 

هذا الموضوع بيساعدكم خصوصا لأني أحب السهر و الأكل وأحاول دايما انوع اشوف ايش اللي بالثلاجة واخلط كل شي وابتكر أشياء جديده ^^

اول شي لازم تفكرون فيه انا مشتهي حلو ولا مالح ؟؟؟

 هذي بعض الأفكار اللي أنا احب اسويها والمكونات دايما تكون متوفرة بالبيت

البيتزا السريييععه

هذي الأكلة دايما اسويها غدا فطور عشا ..حق اي وقت مرا حلوة ومشبعه طبعا سهله ومافي احد مايعرفها
اللي تحتاجونه :
بريد او خبز عربي اللي موجود عندكم
كاتشب او صلصة طماطم
الخضار الموجودة عندكم وجاهزة حتى مو لازم تقطعون انا دايما احط زيتون واذا كان لي خلق قطعت فلفل أخضر
جبن موزريلا او اي نوع

الطريقة : ادهني الخبز بالكاتشب وحطي الخضروات وفوقهم كمية كبيره من الجبن واذا عندكم بهارات ايطالية حطيه فوقه يعطي طعم لذييييذ وبس عالمكرويف دقيقة وحده والطبق جاااهز وما أحلى السرعه

افكار سندويشات : عندكم لبنة وزعتر ..جبن مع خيار ولا زيتون ..سندويشة نوتيلا مره لذيذه تهبل جربوها وسخنوها بالمقلاة..نقانق سريعه ماتاخذ وقت ..تونا مع مايونيز وشطة وخيار مقطع يا سلااااااام عاللذه 

طبق ثاني احب اسويه ياخذ وقت شوي وهي المكرونه السريعه بالصلصة الوردية

تحتاجون :

مكرونه جاهزة
كريمة خفق
ملعقة جبن سايل
جبن موزريلا
كاتشب
البهارات اللي تحبونها انا احط البهارات الايطاليه مع ملح وفلفل وشوي بودرة الثوم

الطريقة : بالقدر حطي المكرونه اللي سلقتيها من قبل مع قشطة الخفق وحركي لما تحسينه ثقل شوي حطي الكاتشب والبهارات والجبن السايل طبعا مقدار الكاتشب حسب ماتحبون وكل حين ذوقوا شوفوا اذا يحتاج ملح اكثر ولا كاتشب ...آخر شي حطي جبن الموزريلا وسكري النار وبكذا خلصت الباستا السهله واللي ماتحتاج شي ..بالعافيه عليكم 

اذا كنتوا مشتهيين شي حالي ولذيذ عندكم هالفكرة اللي تجنن آيس كريم مع كل شي الكككاوات الموجودة عندكم بالثلاجة ولا بالمخزن  كتكات سنكرز اوريو فليك مالتيزر نوتيلا مارس اي شي موجود ...كسروها كلها وحطوا 4 او 5 كور ايس كريم من عندكم وخلطوا مع بعض وزينوه بككاو الهيرشي ..يم يم دايما يعدل مزاجي هالايس كريم

عندكم اطباق البيض اللي ماتخلص ولا تنتهي 

اللي تحتاجونه :

بصله
طماطه
شوية بقدونس واذا مافي مو لازم
3 بيضات
فلفل وملح
الطريقة مافي اسهل منها : قطعي البصل صغار وحطيه بالمقلاه انتظري شوي يذبل وحطي الطماط بعد ما قطعتيه صغار مع البقدونس والملح والفلفل بالمقدار اللي تبونه وانتظروا شوي لما تحسون الطماط صار ذايب يعني لما تضغطون عليه ينعفس... الحين حطوا البيض وسكروا عليه خلوه دقيقة بعدين دخلوه الفرن من فوق وانتظروا لما يستوي الصفار طلعوه من الفرن واكلوه مع اي خبز مو جود بالبيت لذاذه

في نهاية هذه التدوينة احب اقول في الليل دايما ناكل واجد حاولوا تقللون هالشي او انكم تاكلون قبل النوم بساعتين لأن الاكل بعد النوم يسبب اضرار كثيره عالمعده والجسم كله ..في اكلات كثيره انا ماقلتها عندكم الاندومي بكل انواعه ..فواكه مع الروب اليوناني .. خلطة زبادي مع تشبس مرا تشبع .. اذا كان عندكم وقت ممكن سلطة سريعه بس اشك اذا لكم خلق تسوون اصلا

تحياتي لكم واتمنى تجربون هالأفكار..حلوة سريعه وخفيفه عليكم ان شاءالله *

أشياء تحتاجين تعرفينها عن الجامعه

لكل البنات اللي راح يتخرجون هالسنه وبيدخلون السنة التحضيرية بإذن الله طبعا راح تكونون ضايعات وممكن مافي أحد يساعدكم في أشياء كثير لازم تعرفونها قبل لا تدخلون الجامعه ..هالموضوع راح يساعدكم عشان تعرفون اغلب الأشياء المهمة عن الجامعه

اليوم اللي قبل 

اول شي لازم تعرفين انك صرتي كبيره فلازم تهتمين انتي بكل امورك سواء الدراسية او الحياتيه .. جهزي كل شي تحتاجينه قبل اول يوم جامعه عادة ماتحتاجين دفتر لأن اول يوم يكون دايما تعريفي يخلونك تتعلمين عن التخصصات والسنة التحضيرية وهكذا... احتياطا أخذي نوت وقلم معاك .. جهزي ملا بسك والمكياج و الاكسسورات عشان تخلصين اسرع لأن دايما هالأشياء تخليك تتأخرين وخذي شنطة صغيرة وحطي بس الأشياء الضرورية لأنك ماتبين تثقلين على نفسك خصوصا مع الحر والجامعه كبيرة وبتمشين فيها كثير فراح تتعبين اذا شلتي كل شي معاك 

جهزي منبهك و نامي بدري وارتاحي وخلي عنك التوتر لأنه ماراح يجيب لك شي الا التفكير والهم ..ثقي ان بكرا راح يكون يوم جميل وجديد عليك

اول يوم جامعه 

بعد ما تجهزتي لأول يوم اقري الأذكار وابتسمي وخلي قلبك مرتاح ...اذا وصلتي الجامعة بدري استكشفي الأماكن  والكلاسات ووين الكافيتيريا مثلا ولا تخافين من السؤال نصيحه يا بنات بعدوا الخجل على جنب في الجامعه لأنك لازم واكيد بتتكلمين فخلك واثقة من نفسك وروحي لأي بنت تعرفينها ولا ماتعرفينها اسأليها وين مكان هذا الكلاس مثلا ولا وين قاعة طالبات التحضيري 

اذا كنتي من النوع اللي يكون صداقات بسرعه فحاولي تتعرفين على البنات اللي جمبك قبل بداية المحاضرة..سأليهم في أي مدرسة درسوا؟؟ ايش تخصصاتهم؟؟ تكلمي عن نفسك شوي .. واذا كنتي من النوع الخجول عادي جدا مو شرط تكونين صداقات من بداية الترم لأن أساسا البنات اللي بتتعرفين عليهم ماراح تشوفينهم كثير لأن الكلاسات مختلفة بس حاولي تصيرين واثقة من نفسك أكثر واذا شفتي أي بنت تعرفينها من الثانوي اقعدي معاها وسولفي ماراح تتضايق منك 

اذا توترتي ولا حسيتي نفسك متضايقة من المكان على طول استغفري ولا قولي الأذكار انا كنت أحط السماعات وأسمع قرآن سورة البقرة ولا آيات السكينة وكنت أرتاح عليهم 

راح يخلص اليوم بسرعه  واول شي لازم تسوينه لما ترجعين ترتبين موادك للتحضيري ..أقري اول شي عن تخصصك وشوفي المواد اللي لازم تاخذينها وانصحكم يا بنات تخلون يوم الخميس أخف يوم عليكم واذا تقدرون تخلونه اوف بعد يكون أفضل لأنه مره يحسن من النفسيه اذا طلعتي بدري من الجامعه آخر يوم في الأسبوع ..

مواد الجامعه 

اللي دخلوا تخصصات جديدة او صعبة مثل الطب والهندسة لازم تعرفون ان المواد اللي راح تآخذونها بتكون بالانجليزي فيبغالهم جهد من البداية في المذاكره .. لاتخلون هالشي يخوفكم لأن كل البنات اللي دخلوا قبلكم اغلبهم ما كانوا كثير يعرفون انجليزي ومع الاجتهاد نجحوا بالمواد ودخلوا التخصص اللي اهم يبغونه ..

كل شي بالبداية صعب بس تتعودون عليه ولا تتضايقون من درجاتكم بالاختبارات اذكر مره الدكتورة قالت لنا انها في أول كويز لها خذت 2 من 10 طيب كيف صارت دكتورة وعندها ماجستير وبكالورياس كلها بالاجتهاد ترى حتى البنات اللي كانوا متفوقات بالمدرسة بيلاقون صعوبات ماتقدرين تنجحين بدون ما تضغطين على نفسك شوي ودايما تذكروا ان هالتعب كله راح يروح  وبترتاحون كثيير بالمستقبل 

في نفس الوقت لا تضغطون على نفسكم كثيييييير ريحوها شوي وخلوها تتنفس قسموا وقتكم ورتبوا موادكم عدل هذا كل اللي تحتاجونه 

المشاريع 

البنات اللي مادخلوا مدرسة مقررات راح يتخوفون من هالكلمة .. المشاريع !! يمكن تشوفونه شي جديد وصعب بس الصراحه هو على حسب الدكتوره .. مثلا وحده تبغاك تشرحين درس ولا الثانية تبغى بحث بسيط في موضوع ولا مثلا تقسمكم مجموعات وكل مجموعه تسوي أشياء تطلبها منهم يعني كلها على الدكتورة بس اسمعي ايش اللي تطلبه ونفذيه لا اكثر ولا اقل اهم شي انك بتآخذين على هالشي درجات كثيره تعوض لك عن الدرجات اللي خسرتيها بالاختبارات

الغياب بالجامعه 

اهم نقطة انه الغياب اكثر من الساعات المحددة بدون عذر يؤدي لحرمان المادة !!! خلوا الغيابات لآخر الترم افضل وفي طريقة عشان تحسبون عدد الساعات اللي تقدرون تغيبونها في المقرر دوروا عليها بالنت وحسبوا عدد ساعات المادة ..شوفو المحاضرة اللي بتاخذونها قبل لا تغيبون اذا ما كانت كثير مهمة ويمديكم تاخذونها من البنات وعندكم  ساعات غياب كثيييره اقولكم غيبوا وماعليكم بشي ريحوا عمركم  بس لا تنسون عدد الساعت حسبوا قبل ماتغيبون عشان ما يجيكم انذار..ونصيحه لا تغيبون عن الاختبارات حتى لو كنتوا تعبانين تآخذون درجات قليله أحسن من أنكم تاخذون صفر وبعض الدكاترة اذا عادوا الاختبار يخلونه اصعب من الاختبار الاصلي الله أعلم ليه ..

آخر نصيحة لما تدخلون الجامعه تذكروا انكم احين ناس جدد الثانوية راحت وخلصت سواء كنتي كسلانه ولا من اكبر الدوافير هذا مايحدد معدلك في الجامعه .. اللي يحدده نفسك الجديده ..اجتهدي على نفسك وغيري كل شي..مثلا اذا مافهمتي ولا شي بالمحاضرة فتحي المواقع واليوتيوب كثيييير يساعد زي ما قلنا كل البنات يستفيدون منهم ..محد راح يفيدك بالجامعه الا نفسك لا تفكرين تعتمدين على البنات ولا على الدكاترة ترى محد بيعطيك وجه وبيقولون لك انتي مسؤولة عن نفسك ليش جايتنا على النهاية .. لا تنسين هالكلام .. 

ان شاء الله اكون ساعدتكم واتمنى اي أحد قرأ هالكلام وعنده سؤال يجيني  راح اجاوب بكل رحابة صدر .. الى اللقاء3>